SLT-ordninga fungerer som overbygg for alt førebyggjande arbeid i Stord kommune, og er eit samarbeid mellom kommunen og lensmannen. Tiltak som vert sette i gang i regi av SLT skal byggja opp om, og utvikla, ordinær verksemd.
Terje Eriksen (bildet) er dagleg leiar for SLT.
Slik er SLT organisert
SLT–samarbeidet i Stord kommune er organisert med ei styringsgruppe, eit arbeidsutval og ulike arbeidsgrupper.
Styringsgruppa
- Lensmannen i Stord
- Strategisk leiing (kommunalsjefane) i Stord kommune
- SLT–koordinator (sakshandsamar og sekretær).
Styringsgruppa møtest fire gonger i året.
Arbeidsutvalet
Under styringsgruppa er det oppnemnt eit arbeidsutval, som har til oppgåve å planleggja og gjennomføra tiltaka i verksemdsplanen.
Arbeidsutvalet består av einingsleiarar og andre som rår over personal– og økonomiske ressursar. Utvalet møtest 6- 8 ganger i året.
Arbeidsutvalet set ned arbeidsgrupper i høve til dei einskilde tiltak. Arbeidsgruppene består av representantar for einingane, ungdom, friviljuge organisasjonar og andre samarbeidspartnarar. Gruppene vert oppløyste når tiltaka er utførte.
SLT-koordinatoren
SLT-koordinator Terje Eriksen er dagleg leiar for SLT-ordninga. Han følgjer opp tiltak som styringsgruppa og arbeidsutvalet vedtek, hentar inn nye idear og har budsjettansvar.SLT- koordinatoren har kontorplass ved Stord Lensmannskontor og er lønna av Stord kommune.
Målsetjing
Målsetjinga med SLT-ordninga i Stord kommune er å medverka til ei forpliktande og god samordning av tiltak som verkar kriminalitetsførebyggjande, rusførebyggjande, og som reduserer faren for at born og unge utviklar psykiske problem og åtferdsproblem.
Born og unge i Stord kommune skal gjennom SLT sikrast betre rammer om oppvekstvilkåra sine, slik at dei veljer å leva livet sitt på ein måte som er positiv for dei sjølve og andre.
Tiltak som vert sette i verk gjennom SLT–prosjektet, skal støtta opp om, utvikla og forankrast i ordinær verksemd.
I SLT–samarbeidet skal ein søkja å engasjera friviljuge organisasjonar, privatpersonar, næringsliv, foreldre og ungdom, forutan politi og kommunale einingar. Samarbeidet kan også inkludera fylkeskommunen og nabokommunane.
Målgrupper
SLT si hovudmålgruppe er born og unge i alderen 12–18 år, særleg:
- born og unge som har vanskelege oppveksttilhøve
- born og unge som gjer lovbrot
- born og unge som gjer, eller kan ventast å gjera, handlingar som er til skade for dei sjølve eller andre.
Hovudsatsingsområde
På bakgrunn av rapportar, undersøkingar og meldingar frå dei samarbeidande einingane, satsar SLT–utvalet på følgjande:
Rusmisbruk
- Heva debutalderen for bruk av alkohol
- Hindra bruk av ulovlege rusmidlar
- Hindra nyrekruttering til dei etablerte rusmiljøa på Stord
- Gjera ungdom bevisst på konsekvensane av rusmisbruk
- Gjera ungdom bevisst på å ta eigne val
- Mobilisera og auka samarbeidet med foreldregruppa i arbeidet med å førebyggja rusproblem blant born og ungdom
- Heva foreldrekompetanse gjennom aktiv foreldrerettleiing
- Auka innsatsen i skulane og samordna det rusførebyggjande arbeidet der
Åtferdsproblem og ulovleg fråver frå skulen
- Redusera ulovleg fråver
- Auka ansvarsfølelse og gjensidig respekt
- Arbeida aktivt mot vald, mobbing og utagering i skulen
Psykiske problem
- Redusera bakgrunn for, og framvekst av, psykiske problem
- Styrkja og utvikla ressursar og sjølvtillit hos born og unge.
Aktuelle arbeidsområde
Rusførebyggjande arbeid i skulen:
- SLT og Utekontakten driv desse programma i skulen:
- "Unge og rus" på sjuandetrinnet
- " Foreldresamarbeid" for foreldra til elevane på sjuandetrinnet.
SLT organiserer i tillegg:
- MOT- tiltaket
MOT-informatørar driv førebyggjande arbeid på 8.-10.trinnet
Les meir om MOT på www.mot.no.
- VOKT- tiltaket
Seks VOKT-arbeidarar (sivilarbeidarar med opplæring i valds-og konfliktløysande arbeid) arbeidar i dei to ungdomsskulane i kommunen.
Les meir om VOKT på www.vokt.no.
- "Av og til" - prosjektet.
- SLT har etablert fem nabohjelpsområde i kommunen
- Unge og rus - førebyggjande tiltak på skulane